मदिरा पिएर होहल्ला गरेपछि गायक राजेश पायल राई पक्राउ

काठमाडाैं चैत २२,

गायक राजेश पायल राई पक्राउ परेका छन् । मदिरा सेवन गरेर होहल्ला गरेको आरोपमा राईलाई गएराति पक्राउ गरिएको प्रहरीले जनाएको छ । पक्राउ पर्नेमा राईसहित अरु चार/पाँच जना छन् । उनीहरू पनि कलाकार नै रहेको प्रहरीको भनाइ छ ।

उनीहरूलाई मध्यराति मदन भण्डारी कलेज अगाडिबाट पक्राउ गरिएको प्रहरी परिसर काठमाडौंले जनाएको छ । प्रहरीका अनुसार उनीहरूलाई प्रहरी वृत्त नयाँ बानेश्वरमा राखिएको छ ।

मदिरा पिएर होहल्ला गरेपछि स्थानीयले प्रहरीलाई खबर गरेका थिए । स्थानीयले खबर गरेपछि प्रहरी पुगेर उनीहरूलाई नियन्त्रणमा लिइएको हो ।

उनीहरूलाई आजै आफन्तको जिम्मा लगाइने प्रहरीको भनाइ छ ।