काठमाडौँ माघ २४
वरिष्ठ कलाकार सुनिल थापाको निधन भएको छ ।
हृदयाघातका कारण आज बिहान थापाथलीस्थित नर्भिक अस्पतालमा उनको निधन भएको कलाकार संघका अध्यक्ष मोहन निरौलाले जानकारी दिए ।
शंखमुलस्थित अपार्टमेन्टमा बस्दै आएका थापा लामो समयदेखि नेपाली र भारतीय चलचित्र उद्योगमा सक्रिय थिए ।
चितवन, माघ ०९-
रङ्ग केवल भित्तामा पोतिने तह होइन, यो सपना हो, पहिचान हो र भविष्यप्रतिको भरोसा पनि हो। यही भरोसालाई २२ वर्षदेखि निरन्तर रंगाइरहेको छ—टाटा पेन्ट्स एण्ड केमिकल इन्डस्ट्रिज प्रा.लि.ले. चितवनको भरतपुरबाट सुरु भएको यो स्वदेशी उद्योग आज गुणस्तर, विश्वास र दीर्घकालीन प्रतिबद्धताको प्रतीक बनेको छ।
आचार्य होल्डिङअन्तर्गत सञ्चालित टाटा पेन्ट्सले टाटा ब्रान्डअन्तर्गत ७, १० र नेपालमै पहिलो पटक १३ वर्षको ग्यारेन्टीसहितका विभिन्न पेन्टहरू उत्पादन गर्दै आएको छ। आईएसओ-लगायत नेपाल गुणस्तर (NS) चिन्ह प्राप्त गरिसकेको यस कम्पनीले स्वदेशी उत्पादनले पनि अन्तर्राष्ट्रिय स्तरको विश्वास जित्न सक्छ भन्ने उदाहरण प्रस्तुत गरेको छ।
कम्पनीकी अध्यक्ष विमला आचार्यको दूरदर्शी नेतृत्व र प्रबन्ध निर्देशक प्रकाश आचार्यको सक्रिय व्यवस्थापनले टाटा पेन्ट्सलाई उद्योग क्षेत्रमा मजबुत रूपमा स्थापित गरेको छ। गुणस्तर र नवीनतालाई आत्मसात गर्दै अघि बढिरहेको कम्पनीले “हामी रंगान्छौं नेपाललाई ! ” भन्ने नारामार्फत स्वदेशप्रतिको माया र प्रतिबद्धता व्यक्त गरेको छ।
यसै क्रममा टाटा पेन्ट्सले चर्चित नायिका तथा मोडल श्रृष्टी खड्कालाई ब्रान्ड एम्बेसडरको रूपमा नियुक्त गर्दै आफ्नो ब्रान्डलाई अझ सशक्त बनाएको छ। प्रबन्ध निर्देशक प्रकाश आचार्य र नायिका खड्काबीच तीन वर्षे सम्झौता भएको हो । उनको व्यक्तित्व, लोकप्रियता र सकारात्मक छविले टाटा पेन्ट्सको सन्देशलाई अझ गहिरो रूपमा आम उपभोक्तामाझ पुर्याउने विश्वास कम्पनीले लिएको छ।
समयसँगै प्रविधि, गुणस्तर र विश्वासलाई रंगाउँदै आएको टाटा पेन्ट्स आज केवल पेन्ट उद्योग मात्र होइन, स्वदेशी उत्पादनप्रतिको गर्वको कथा बनेको छ—जहाँ प्रत्येक रङ्गले नेपाल रंगिने सपना बोकेको छ।
गैँडाकोट, ८ माघ-
गैँडाकोटमा जारी चौथो गैँडाकोट महोत्सव अन्तर्गत बिहीबार चर्चित कलाकार पशुपति शर्मा र दुर्गा सापकोटाले प्रत्यक्ष दोहोरी गाएर दर्शकहरुलाई मनोरञ्जन दिएका छन् ।
गैँडाकोटस्थित नारायणी नदी किनारमा जारी महोत्सवमा पशुपति र दुर्गाले दोहोरी गाएर दर्शकहरुलाई भरतपुर मनोरञ्जन प्रदान गरेका महोत्सवको सांस्कृतिक कार्यक्रम संयोजक किशोर लम्सालले जानकारी दिए । उनीहरुले आफ्ना चर्चित गीतहरु प्रस्तुत गरेपछि साँझ दोहोरी गाएका लम्सालको भनाइ छ । त्यस्तै बिहीबारको कार्यक्रममा शुष्मा शाही ठकुरीसहित स्थानीय कलाकारहरुले समेत प्रस्तुती राखेका लम्सालले बताए ।
महोत्सवको बिहीबार एघार हजार बढी दर्शकले अवलोकन गरेका महोत्सव आयोजक संस्था जिल्ला उद्योग वाणिज्य संघ गैँडाकोट नवलपुरका वरिष्ठ सदस्य एवम् महोत्सव प्रचारप्रसार उपसमिति संयोजक शालिकराम सापकोटाले जानकारी दिए । पुस २५ गते सुरु भएको महोत्सव माघ १० गतेसम्म जारी रहने भन्दै सापकोटाले महोत्सवको दुई लाख बढी दर्शकले अवलोकन गर्ने बताए ।
कृषि प्रदर्शनी, व्यापारिक स्टल, रेष्टुरेन्ट तथा बाल उद्यानसहित २५० बढी स्टल रहेको महोत्सवमा २५ करोड रुपैयाँ भन्दा बढीको आर्थिक कारोबार हुने अनुमान गरिएको सापकोटाले बताए । संघका वरिष्ठ उपाध्यक्ष एवम् महोत्सवका मूल संयोजक छवि कँडेलले स्थानीय कृषि र स्थानीय उत्पादनको प्रवद्र्धन र बजारीकरण गर्ने उद्देश्यले महोत्सव आयोजना गरिएको बताए । महोत्सव अवलोकनका लागि १०० रुपैयाँको टिकटको व्यवस्था गरिएको कँडेलको भनाइ छ ।
विद्यार्थीका लागि ७० रुपैयाँको टिकटको व्यवस्था गरिएको भन्दै कँडेलले ज्येष्ठ नागरिक, अशक्त र अपाङ्ग एवम् शैक्षिक संस्थाबाट संस्थागत रुपमा सहभागी भएका विद्यार्थीहरुलाई महोत्सवस्थलमा निःशुल्क प्रवेशको व्यवस्था गरिएको बताए ।
यसैबीच, महोत्सवको सांस्कृतिक कार्यक्रम अन्तर्गत शुक्रबार चर्चित लोकदोहोरी गायक पुष्कल शर्मासहितका कलाकारको प्रस्तुती रहने जनाइएको छ । शुक्रबार शर्मासँगै कला लम्साल, राशी रिजाल, बन्दना विश्वकर्मा, राकेश विकलगायतको प्रस्तुती रहने लम्सालले बताए ।
चितवन, माघ ०८
माघ ९ बाट सरेको जेन्जी आन्दोलनप्रति समर्पित चलचित्र बिगुल अब फागुन १ गते प्रदर्शन हुने भएको छ । चलचित्रको निर्माण पक्षले शिवरात्रीलाई मध्यनजर गर्दै फागुन १ गतेलाई नयाँ प्रदर्शन मिति तय गरेको हो ।
यस अघि उक्त चलचित्र माघ ९ मा प्रदर्शन हुने भनिएको थियो । तर विशेष कारण देखाउँदै निर्माण पक्षले चलचित्र प्रदर्शनको मिति सारेको हो । चलचित्रका लेखक तथा निर्माता दिनेश कोइरालाले प्राविधिक कारणले माघ ९ बाट फागुन १ गतेलाई प्रदर्शन मिति सारिएको जानकारी दिए ।
चलचित्र बिगुलमा उठाईएको बिषयबस्तु गत भदौमा जेन्जी युवाले गरेको देशब्यापी आन्दोलनसँग मेल खान्छ । पहिले नै तिनै बिषयमा केन्द्रित भइ फिल्म निर्माण गरिनु अचम्मको संयोग भएको निर्माण पक्षको भनाइ छ ।
बिगुलमा उठाएको मुल मुद्धा र पछि जेन्जी पुस्ताले उठाएका माग,देश बिकास र परिवर्तनप्रति आम नेपालीको चाहनाको बिषय ठ्याक्कै मिल्न गएको निर्माता तथा लेखक कोइरालाको भनाइ छ । यो चलचित्र जेन्जी आन्दोलनप्रति समर्पित गरिएको छ । चलचित्रले युवा र महिलामा चेतना जगाइ भ्रष्टाचार र बिकृति उन्मुलनका लागि परिवर्तनको बिगुल फुकेको निर्देशक रमेश कोइरालाको दाबी छ ।
कल्पना पौडेलको प्रस्तुति तथा म्याग्नोलिया ग्रुपको ब्यानरमा निर्माण भएको चलचित्रमा बेनिशा हमाल, नरेन खड्का,रमेश बुढाथोकी,नीर शाह,सरोज खनाल,हेमन्त बुढाथोकी,शिसिर वाङ्देल,बिनोद न्यौपाने,जेएन घिमीरे,गीता अधिकारी,मीरा पण्डित,मानश्री शर्मालगायतका कलाकारले अभिनय गरेका छन् ।
गैँडाकोट, २७ पुस
नवलपुरको गैँडाकोटस्थित नारायणी नदीकिनारमा सञ्चालित चौथो गैँडाकोट महोत्सवमा कलाकार समीक्षा अधिकारीलाई दर्शकले साथ दिएका छन् । आइतबार साँझ महोत्सवको स्टेज उक्लिएकी समीक्षालाई दर्शकहरुले करिब एक घण्टा साथ दिए ।
साँझमा नारायणीको चिसो बढ्दै जाँद स्टेजमा उक्लिएकी समीक्षाका गीतले दर्शकलाई भरपुर मनोरञ्जन प्रदान ग¥यो । उनले आफ्ना चर्चित गीतहरुद्वारा दर्शकहरुलाई मनोरञ्जन प्रदान गरेकी थिइन् ।
छड्के गलबन्दी, दुस्मन हेरेको हेरेइ, बिजुली बालेरलगायत १० भन्दा बढी गीत गाएर समीक्षालाई मनोरञ्जन दिएकी महोत्सवको सांस्कृतिक कार्यक्रम संयोजक किशोर लम्सालले जानकारी दिए ।
लम्सालकाअनुसार आइतबार महोत्सवमा समीक्षासँगै सरिता गुरुङ तथा आरसी पौडेल र दीपक खड्काले प्रस्तुती राखेका थिए । त्यसैगरी, महोत्सवमा आजदेखि भजन प्रतियोगितासमेत सुरु भएको छ ।
महोत्सवको प्रचारप्रसार उपसमिति संयोजक शालिकराम सापकोटाकाअनुसार स्थानीय कला र संस्कृतिको संरक्षण र प्रवद्र्धन गर्ने उद्देश्यले आयोजना गरिएको भजन प्रतियोगितामा १८ वटा भजन समूहको सहभागिता रहेको छ ।
काठमाडौं पुस २७-
नेपालीभाषी भारतीय गायक तथा अभिनेता प्रशान्त तामाङ अब हामीमाझ रहेनन् । ४३ वर्षको उमेरमा गायक तामाङको आइतबार भारतको नयाँ दिल्लीमा निधन भएको छ । गायन रियालिटी शो इन्डियन आइडलको तेस्रो सिजनको विजेता बनेसँगै उनी भारतका साथै नेपालमा समेत चर्चामा आएका थिए ।
हिन्दी र नेपाली गरेर थुप्रै गीतमा स्वर दिएका तामाङले केही नेपाली फिल्ममा समेत शीर्ष भूमिकामा अभिनय गरेका छन् । ‘गोरखा पल्टन’, ‘निशानी’, ‘किन मायामा’, ‘अँगालो यो मायाको’,‘परदेशी’, ‘धड्कन भित्र’, ‘परदेशी २’ मा उनले अभिनय गरेका छन् । उनको पछिल्लो नेपाली फिल्म ‘लडाइँ पहिचानको’ हो । यो फिल्म गत मंसिर ५ गते प्रदर्शनमा आएको थियो ।
चर्चित वेब–सिरिज ‘पाताल लोक’मा समेत काम गरेका उनी पछिल्लो समय सलमान खानको फिल्म ’ब्याटल अफ गलवान’मा व्यस्त थिए । तर छायांकन सकेर डबिङ गर्न नपाउँदै तामाङको निधन भयो । उनको हृदयघातका कारण निधन भएको जनाइएको छ ।
गायक तामाङको निधनप्रति नेपाली कलाकर्मीले पनि गहिरो दुःख व्यक्त गरेका छन् । अभिनेत्री केकी अधिकारीले प्रशान्त तामाङलाई इन्डियन आइडल मार्फत संसारभर छरिएका सम्पूर्ण नेपालीभाषीलाई एउटै भावनामा बाँध्न सफल गायकको रूपमा लिएको बताएकी छन् । केकीले सामाजिक सञ्जालमा पोस्ट गरेकी छन्, ‘असामयिक निधनको खबरले शून्यता महसुस गराएको छ । २०१०–०११ तिर उहाँको स्वरमा सजिएको गीत ‘मनसाइली’मा अभिनय गर्दाका ती अमूल्य पलहरू र ‘परदेशी–२’ मा सँगै काम गर्दाका सम्झनाहरू आज झल्झली मनमा आइरहेका छन् । उहाँको संगीत, सरलता र मुस्कान सधैं हामीमाझ जीवित रहनेछ । प्रिय प्रशान्तजीप्रति हार्दिक श्रद्धाञ्जली ।‘
‘परदेशी’ फिल्मकी अभिनेत्री रजनी केसीले तामाङलाई प्रतिभाशाली कलाकारको रुपमा चर्चा गरेकी छन् । तामाङसँगको एक तस्बिर सेयर गर्दै उनी लेख्छिन्, ‘एकै चलचित्रमा सँगै काम गर्ने अवसर पाएको यस्तो प्रतिभाशाली कलाकार र गायकको असामयिक निधनले अत्यन्त दुःखित बनायो । उहाँको कला र स्मृतिहरू सधैं हृदयमा रहनेछन् । दिवंगत आत्माको चीरशान्तिको कामना गर्दै शोकसन्तप्त परिवारप्रति गहिरो समवेदना ।’
अभिनेत्री तथा निर्देशक दीपाश्री निरौलाले प्रशान्तसँगको तस्बिर सेयर गर्दै लेखेकी छन्, ‘अल्पायुमै निधन, दु:खद् खबर । प्रशान्तजीको आत्माले शान्ति पाओस् । परिवारमा धैर्यधारण गर्ने शक्ति मिलोस् ।’
कलाकार निर्मल शर्माले प्रशान्त तामाङ दृष्टिबाट गायब भएपनि सम्झनाबाट कहिल्यै टाढा नहुने बताएका छन् ।
अभिनेता जितु नेपालले पनि तामाङसँगको तस्बिर सामाजिक सञ्जालमा राख्दै दुःख व्यक्त गरेका छन् । ‘यो अकल्पनीय र अत्यन्तै दुःखद् समाचार लेख्नुपर्दा म अत्यन्तै मर्माहत छु । स्वर्गीय प्रशान्तजीप्रति भावपूर्ण श्रद्धाञ्जली अर्पण गर्दछु । शोकसन्तप्त परिवारजनमा हार्दिक समवेदना व्यक्त गर्दछु । भगवानले यो असह्य पीडा सहन सक्ने शक्ति प्रदान गरुन्,’ उनले भनेका छन् । गायक प्रमोद खरेलले ‘कस्तो अप्रिय र अपत्यारिलो खबर सुन्नुपर्यो’ भनेर लेखेका छन् ।
गायिका आस्था राउतले दिवंगत प्रशान्त तामाङको अनन्त शान्तिको कामना गरेकी छन् । उनले प्रशान्त तामाङको निधन नेपालीभाषी सबैका लागि दु:खद् घटना भएको बताएकी छन् । ‘कहिलेकाहीं सामाजिक सञ्जालमार्फत कुरा पनि हुने गरेको थियो । उहाँ नेपालका लागि चिन्तित हुनुहुन्थ्यो,’ आस्थाले भनेकी छन् ।
हास्य कलाकार मनोज गजुरेलले लेखेका छन्, ‘नेपालीभाषी विश्वबासीलाई एउटै मालामा जोड्ने प्रशान्त तामाङप्रति हार्दिक श्रद्धान्जली । यो विशाल समुदायले तपाईंलाई युगौंयुगसम्म सम्झिरहनेछ । स्वर्गमा बास होस् प्रिय प्रशान्त ।’
नारायणगढ । अंग्रेजी नयाँ वर्षको अवसरमा नारायणगढको क्याम्पाचौरमा फुड एण्ड म्युजिक न्यु इयर कार्निभल हुने भएको छ । ॠषिङ नेवा: पर्व एवं संस्कृति खलको आयोजनामा पुष १३ देखि १७ गतेसम्म उक्त कार्यक्रम हुने भएको हो ।
पाँच दिनसम्म चल्ने कार्यक्रममा खाना खाजाका स्टलसँगै हरेक दिन चर्चित कलाकारहरुको प्रस्तुति रहनेछ । पहिलो दिन पुष १३ गते डिसेम्बर २८ मा कन्द्ररा ब्याण्ड र हुलाकीको प्रस्तुति रहनेछ । यस्तै न्यु इयर इभको दिन पुष १६ गते चर्चित र्यापर लाहुरे र तृष्णा गुरुङ एण्ड दि कोल्याब आउनेछन् ।
नयाँ वर्षको दिन पुष १७ गते अर्थात जनवरी १ मा भिटेन र समिर श्रेष्ठ फिचरिङ्ग गूड ब्वाईजले दर्शक झुमाउनेछन् । यस बाहेक चितवनको दृश्य, यात्रा, ड्रिमर्ज, एफथ्री, प्रकाश एण्ड दि एराज र अध्याय ब्याण्डको पनि प्रस्तुति रहनेछ ।
कार्यक्रमका लागि टिकट दर पाँच सय रुपैयाँ तोकिएको छ । खल्ती एपबाट अनलाइन टिकट खरिद गर्न सक्ने आयोजकले जानकारी दिएको छ । यस्तै सोही दिन कार्यक्रमस्थलबाटै पनि टिकट लिन सकिनेछ ।
चितवन, ३ पुसः
चितवनको कटाव दि स्कार्पमेन्टले ‘माया के हो’ को अफिसियल म्युजिक भिडियो सार्वजनिक गर्ने भएको छ । ब्याण्डले आज (बिहीबार) प्याराडाइज क्याफे बिगबजारमा पत्रकार सम्मेलन गर्दै गीतको अफिसियल म्युजिक भिडियो पुष ९ गते २४ डिसेम्बरमा रिलिज हुने जानकारी दिएको हो ।
ब्याण्डले एडम्स लाउन्ज बाह्रघरेमा क्रिसमस इभ आयोजना गरेर गीत प्रिमियर गर्न लागेको हो । सोही दिन युट्युबमा पनि गीत रिलिज हुने ब्याण्ड म्यानेजर अनुपम घिमिरेले जानकारी दिए । एक दशक अघि स्थापित ब्याण्डले यो गीत तयार पारेको ७-८ वर्ष भईसके पनि म्युजिक भिडियो भने हालै मात्र तयार भएको हो ।
विविध कारणले अफिसियल म्युजिक भिडियो निर्माणमा ढिला भएको ब्याण्डका भोकलिस्ट प्रविण लोप्चनले बताए । भिडियोमा कन्टेन्ट क्रियटर सविन मगर र प्रमिशा सिग्देल फिचर्ड छन् । दुबैको यो डेब्यु म्युजिक भिडियो हो । डेब्यु भएकोले उत्साहित रहेको दुबैले बताए ।
अमृत गुरुङले निर्देशन गरेको भिडियोको सह निर्देशक किरण ढकाल हुन् भने सिनेमाटोग्राफर सन्देश मगर र लवसन हुन् । हाई स्टेसनले भिडियो निर्माण गरेको हो । पत्रकार सम्मेलनमा नारायणगढ जेसिस वर्ष २०२६ का अध्यक्ष सन्तोष पण्डितले सफलताको कामना गरे ।
काठमाडौँ, पुस २-
हाँस्य कलाकार अर्जुन घिमिरे ‘पाँडे’ले निर्देशन गर्नुभएको चलचित्र ‘झरीपछिको इन्द्रेणी’ यही पुस ४ गते शुक्रबारदेखि देशभर प्रदर्शन हुनेभएको छ ।
सो चलचित्रको विषयमा जानकारी दिने उद्देश्यले आज यहाँ आयोजित कार्यक्रममा निर्देशक घिमिरेले भ्रष्टाचार र बेथितिविरुद्धको आवाज चलचित्रमा उठाउन प्रयास गरिएको बताउनुभयो ।
उहाँले भन्नुभयो, “चलचित्रकर्मीको दायित्व मनोरञ्जन दिने मात्र नभई समाजलाई जागरुक बनाउने पनि हो । सोही मूल्यमान्यतालाई आत्मसात् गरी भ्रष्टाचार र सामाजिक विकृतिका विरुद्ध आवाज उठाउँदै देश र जनताका पक्षमा चलचित्र निर्माण गरेको छु । देशभक्त सच्चा नागरिकले सोच्ने कोणबाट चलचित्र तयार गरिएको छ ।”
गत जेन्जी आन्दोलनअघि नै चलचित्रको छायाङ्कन सकिएको उल्लेख गर्दै निर्देशक घिमिरेले भ्रष्टाचार, बेथिति र विसङ्गति विरुद्धको आवाजलाई चलचित्रमार्फत् उजागर गर्न यथासक्य प्रयास गरिएको बताउनभयो । उहाँले चलचित्रले सामाजिक सन्देश प्रवाह गरेता पनि त्यसको शैली चलचित्रकै रहेको स्पष्ट पार्नुभयो ।
निर्देशक घिमिरेले चलचित्रको नामले नै कथाको सङ्केत गरेको बताउँदै ‘झरीपछिको इन्द्रेणी’लाई अध्यारोपछिको उज्यालोको रूपमा बुझ्न आग्रह गर्नुभयो ।
उक्त चलचित्रमा अभिनेता गणेश उप्रेती, रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, विमोचन दवाडी, जेसिका पोखरेल, प्रियना आचार्य (मुन्नी), अंशु महर्जन, राजेन्द्र नेपालीलगायतका कलाकारले अभिनय गर्नुभएको छ ।
अभिनेता रमेश उप्रेतीले चलचित्रले अहिलेको समग्र देशको अवस्थालाई चित्रण गरेको बताउनुभयो । “मैले धेरै समयपछि यो चलचित्रमा काम गरेँ, किनकी यसको विषयवस्तु ठूलो पर्दामार्फत दर्शकमाझ पुग्नुपर्छ भन्ने लाग्यो । आम नागरिकको कथामा बनेको चलचित्रलाई एउटा कलाकारले कलाको माध्यमले न्याय दिनुपर्छ भन्ने महसुस गरी काम गरेका छौँ”, उहाँले भन्नुभयो ।
यसै चलचित्रमार्फत नव कलाकारका रूपमा विमोचन दवाडी देखिँदै हुनुहुन्छ । उमेरले जेनजी पुस्ताका कलाकार दवाडीले आफ्नो पुस्ताको भावना र आवाजलाई चलचित्रमा समेटिएको बताउनुभयो ।
“म आफैँले पनि चलचित्रको कथा र पात्रसँग ‘कनेक्ट’ भएको महसूस गरेँ । पहिलो चलचित्र पाउनुको खुसीसँगै मेरो पुस्ताको कथा पाउँदा म आफूलाई भाग्यमानी महसुस गर्छु । अहिले मसँगका धेरै साथी विदेशमा गएर अध्ययन गर्ने र भविष्य बनाउने सोचमा हुनहुन्छ । अहिले नेपालमै बस्नु भनेको रहर नभई बाध्यताका रूपमा पनि बुझ्ने गरिएको छ, त्यो प्रवृतिलाई चलचित्रमा समेटिएको छ र समाधान पनि दिइएको छ ।”, उहाँले भन्नुभयो ।
नागराज इन्टरटेन्मेन्ट प्रालिले निर्माण गरेको उक्त चलचित्रमा निर्देशक घिमिरेले कथा लेखन, गणेश कार्की तथा विशाल घिमिरेले पटकथा लेखन र बुद्ध थापाले छायाङ्कन गर्नुभएको छ । रासस
२३ मंसिर,काठमाडौं।
पछिल्लो समय एकपछि एक नेपाली चलचित्रले राम्रो व्यापार गर्न थालेका छन् । गत वर्ष पूर्णबहादुरको सारङ्गीले एतिहासिक व्यापार गरेपछि नेपाली चलचित्रको व्यापार राम्रो हुँदै गएको छ।
कुनै समय लगानी पनि उठाउन गाह्रो हुने अवस्थाबाट नेपाली चलचित्रले राम्रो व्यापार गर्न थालेको जानकार बताउँछन्। चलचित्र विकास बोर्डअन्तर्गत रहेको ‘बक्सअफिस एटदरेट सिनेपाः’ ले सार्वजनिक गरेको यही मङ्सिर २० गतेसम्मको तथ्यांकअनुसार चलचित्र परानले करिब १७ करोडको व्यापार गरेको छ।
गत कात्तिक १४ गतेदेखि प्रदर्शनरत उक्त चलचित्रले घरेलु बजारमा १६ करोड ९७ लाख ९३ हजार ३५४ को व्यापार गरेको छ। बसाइँसराइ र पारिवारिक कथामा तयार भएको उक्त चलचित्रलाई दीपकप्रसाद आचार्यले निर्देशन गरेका हुन्।
“चलचित्र परानलाई दर्शकले आफैंले हेर्नुस् भनेर सिफारिस गरेको पाएका छौं, बुबाछोराको कथालाई धेरै दर्शकले आफूसँग जोडेर प्रतिक्रिया दिनुभएको छ, यो हाम्रै समाजको कथा हो”, निर्देशक आचार्यले भने।
नीर शाह, मदनकृष्ण श्रेष्ठ जस्ता दिग्गज अभिनेताले अभिनय गरेको उक्त चलचित्रका लागि हालसम्म पाँच लाख ९८ हजार ३०९ वटा टिकट बिक्री भएका छन्। चलचित्रमा केकी अधिकारी, महेश त्रिपाठी, पूजा चन्द, अञ्जना बराइलीलगायतका कलाकारले अभिनय गरेका छन्।
साथै गत असोज ३१ गतेदेखि प्रदर्शनमा आएका चलचित्र ‘जेरी अन टप’ ले तीन लाख ९१ हजार ९९२ वटा टिकट बिक्री गर्दै १२ करोड २६ लाख छ हजार २४० को व्यापार गरेको छ।
अभिनेता अनमोल केसी, आँचल शर्मा, जसिता गुरुङ, भुवन केसी, केदार घिमिरे र उषा खड्गीलगायतका कलाकारले अभिनय गरेको उक्त चलचित्रलाई सुयोग गुरुङले निर्देशन गरेका छन्। सगरमाथा आरोहण र प्रेम कथामा आधारित उक्त चलचित्रलाई सरोज न्यौपानेले निर्माण गरेका हुन् ।
कवि उपेन्द्र सुब्बाले निर्देशन गरेको चलचित्र ‘जारी २ः सङ अफ च्याब्रुङ’ ले दुई लाख सात हजार ७१४ टिकट बिक्री गरी छ करोड २३ लाख ६९ हजार २०० को व्यापार गरेको छ। दयाहाङ राई, मिरुना मगर, ऋचा शर्मा, प्रेम सुब्बा, पुस्कर गुरुङलगायतकका कलाकारले अभिनय गरेको उक्त चलचित्रमा लिम्बू समुदायको जारी परम्परा र च्याब्रुङको कथालाई मिसाएर पटकथा तयार गरिएको छ। यो चलचित्र गत कात्तिक २१ गतेदेखि प्रदर्शनरत छ।
बाल गायकका रुपमा परिचित भएका अशोक दर्जीको जीवनीमा आधारित रहेर तयार गरिएको चलचित्र ‘मनबिनाको धन’ ले सोही अवधिसम्म तीन करोड ७९ लाख दुई हजार ८७९ को व्यापार गरेको छ।
टंक बुढाथोकीले निर्देशन गरेको उक्त चलचित्रका लागि हालसम्म एक लाख ४५ हजार ५९ वटा टिकट बिक्री भएका छन्। गत कात्तिक २१ गतेदेखि प्रदर्शनमा आएको चलचित्रमा गायक दर्जीसँगै नीता ढुंगाना, सरोज खनाल, एआर बुढाथोकीलगायतका कलाकारले अभिनय गरेका छन्।
यही मंसिर १२ गतेदेखि प्रदर्शनरत चलचित्र ‘हर्ष’ ले गत शनिबारसम्म घरेलु बजारमा २८ लाख दुई हजार ३४६ को व्यापार गरेको छ। एकता पौडेलले निर्देशन गरेको उक्त चलचित्रका लागि आठ हजार ४३६ वटा टिकट बिक्री भएका छन्।
चलचित्रमा खगेन्द्र लामिछाने, वर्षा राउत, साइमन वादी, निर शाह, सन्तोष पन्त, शर्मिला मल्ल, माओत्से गुरुङ, विशाल पहाडीलगायत कलाकारले अभिनय गरेका छन् ।