घाँस काट्न गएकी महिलामाथि बाघको आक्रमण, बाघले खाइरहेको अवस्थामा शवको उद्दार

चितवन, फागुन १२ –
घाँस काट्न चितवन राष्ट्रिय निकुञ्ज क्षेत्रमा गएकी एक बाघको आक्रमणबाट मृत्यु भएको छ । भरतपुर महानगरपालिका ६ निवासी ६० वर्षीय चिजा सार्कीको मृत्यु भएको हो ।

ईलाका प्रहरी कार्यालय गितानगर चितवनका अनुसार भरतपुर १३ बेलशहरस्थित चितवन राष्ट्रिय निकुञ्ज क्षेत्रमा बाघले आक्रमण गरेको हो ।

चिजा, सिता दराई र हेमराज सापकोटा तिनै जना सोही निकुञ्ज भित्र घांस काट्न गएकोमा चिजा सार्कीलाई बाघले आक्रमण गरेको हो ।

आक्रमणको खबर पाएपछि चितवन राष्ट्रिय निकुञ्ज र वनको टोली हात्तीसहित गएर चिजाको शव ल्याएको निकुञ्जका सूचना अधिकारी गणेश तिवारीले जानकारी दिए । बाघले खाइरहेको अवस्थामा शव उद्दार गरेर ल्याइएको हो ।