काठमाडाैं, पुस २३ –
क्यानडाका प्रधानमन्त्री जस्टिन ट्रुडोले लिबरल पार्टीको नेतृत्वबाट राजीनामा दिने घोषणा गरेकै समयमा अमेरिकी नवनिर्वाचित अमेरिकी राष्ट्रपति डोनाल्ड ट्रम्पले दिएको एक विवादास्पद अभिव्यक्तिले नयाँ तरंग पैदा गरेको छ ।
ट्रम्पले सामाजिक सञ्जालमा क्यानडाबासी अमेरिकाको ५१ औं राज्य बन्न मन पराउने दाबी गरेका छन् । उनले आफ्नो सामाजिक सञ्जाल प्लेटफर्म ट्रुथ सोसलमा लेखेका छन्, ‘क्यानडा अमेरिकाको ५१औं राज्य बन्ने कुरालाई क्यानडाका धेरै मानिसहरूले मन पराएका छन् ।’
ट्रम्पले क्यानडामाथि २५ प्रतिशत आयात शुल्क लगाउने प्रस्ताव गरेका छन् । त्यही प्रस्ताव विवादित बनिरहेका बेला ट्रम्पको अर्को अभिव्यक्तिले क्यानडामा तरंग आएको हो ।
ट्रम्पको यस्तो अभिव्यक्तिलाई लिएर क्यानडाको लिबरल पार्टीभित्र पनि ठूलो विवाद देखिएको छ ।
क्यानडाका उपप्रधानमन्त्री क्रिस्टिया फ्रिल्यान्डले भन्सार शुल्क लगायत अन्य विषय जोड्दै प्रधानमन्त्री ट्रुडो र ट्रम्पको सम्बन्धलाई लिएर गत डिसेम्बरमा अप्रत्याशित रूपमा आफ्नो पदबाट राजीनामा दिएकी थिइन् ।
ट्रुडोको राजीनामासँगै क्यानडाको आगामी राजनीतिक बाटो थप अनिश्चित भएको छ । क्यानडाको आगामी आम निर्वाचन २० अक्टोबरभन्दा अघि हुनुपर्ने संवैधानिक प्रावधान छ ।
Leave a Reply