Category: खैरहनी

चितवन, चैत ४–

खैरहनी नगरपालिकामा क्रियाशिल ४ वटा राजनीतिक दलले नगर प्रमुख शशीकुमार खनियालाई ज्ञापनपत्र बुझाएका छन् । खैरहनी नगरबासीहरुले हाल भोग्नु परिरहेको समस्याहरुको समाधान गर्न १० बुदे ज्ञापनपत्र प्रमुख खनियालाई बुझाएका हुन् ।

उनिहरुले बुझाएको ज्ञापनपत्रमा प्रतिष्पर्धा बिना फोहोर व्यवस्थापनको ठेक्का लगाएको, अनाधिकृत संस्थाको नाममा घरघरमा नम्बर लगाएको ,नगरबासीलाई चर्को पर्नेगरी लादिएको जग्गा वर्गिकरण शुल्क, शीत भण्डार सञ्चालन गर्नेतर्फ उचित ध्यान नदिएको, लदरी खोलाको पुल निर्माणमा लापर्वाही भएको विषयलाई वेवास्ता गर्नु, दुग्ध, तरकारी, माछालगायतका कृषिजन्य बस्तुको उत्पादन, बजार व्यवस्थापन र जोखिम न्युनीकरणमा उचित ध्यान नदिएको उल्लेख छ ।

नगरपालिका भित्रको विद्युत आपूर्तिको समस्या, गुणस्तरहिन विकास, निर्माण एवम् आयोजनाको सवालमा नगरबासीको प्रश्न तथा गुनासाहरु, शुद्ध पिउनेपानीको उपलब्धता र उचित व्यवस्थापन नभएको नगरवासीको गुनासो, ढुङ्गा गिटी बालुवालगायतका प्राकृक्तिक श्रोत साधनको अनाधिकृत दोहन भइरहेको र नागरिकले तिरेको करको दुरुपयोग गरी महच्चे र विलासी गाडी खरिद गरेको बिषय समेटिएको छ । दलहरुको तर्फबाट नेकपा एमाले खैरहनिका अध्यक्ष पुर्ण बहादुर डल्लाकोटिले नगर प्रमुख खनियालाई ज्ञापनपत्र बुझाएका थिए ।

ज्ञापनपत्रमा एमाले अध्यक्ष डल्लकोटी,नेकपा माओवादी केन्द्रका नगर अध्यक्ष रामेश्वर पोखरेल ,राष्ट्रिय स्वतन्त्र पार्टी, खैरहनी नगर समिति कार्यबहाक अध्यक्ष सकुन्तला अधिकारी र राप्रपाका देबराज कंडेल हस्ताक्षर छ । ज्ञापनपत्र बुझेपछि नगर प्रमुख खनियाले नगरपालिका विधि, कानुन अनुसार चलेको दावी गर्दै खवरदारी, सल्लाह आवश्यक पर्ने बताए ।

चितवन, १६ फागुन
स्थानीय तह वित्तीय सुशासन जोखिम मूल्याङ्कन (एफआरए)मा देशभरका पालिकामध्ये खैरहनी नगरपालिकाले उच्चतम अङ्क प्राप्त गरेको छ । सङ्घीय मामिला तथा सामान्य प्रशासन मन्त्रालयले गरेको मूल्याङ्कनमा खैरहनीले ९९ अङ्क प्राप्त गरेर उच्चतम प्रदर्शन गर्ने स्थानीय तह भएको हो ।

मूल्याङ्कनका विभिन्न विषय क्षेत्रका सूचकहरू पूरा गर्दै खैरहनीले उच्चतम अङ्क प्राप्त गर्न सफल भएको नगरप्रमुख शशि खनियाले जानकारी दिनुभयो । योजना, बजेट तथा कार्यक्रम व्यवस्थापन, कार्यान्वयन क्षमता तथा व्यवस्थापन, लेखाङ्कन तथा प्रतिवेदन, अनुगमन, मूल्याङ्कन तथा लेखापरीक्षण, राजस्व व्यवस्थापनजस्ता मूल्याङ्कनका विषयक्षेत्रमा खैरहनीले उत्कष्ट अङ्क ल्याउन सफल भएको बताइएको छ । एक सय पूर्णाङ्कमा खैरहनी नगरपालिकाले ९९ अङ्क ल्याएको छ ।

अघिल्ला वर्षहरूमा जिल्लाको प्रथम हुँदै आएकामा यस वर्ष देशको प्रथम हुन सफल भएको उहाँले बताउनुभयो । अनियमितता कम भएका कारण यस पालिका पहिलो भएको उहाँले बताउनुभयो । उहाँले भन्नुभयो, “सबै कुराको व्यवस्थापन गर्न कठिन छ । त्यसलाई व्यवस्थापन गर्दै अघि बढ्नसके र कानुनसम्मत चल्नसके सफल भइँदोरहेछ ।” राजनीतिक दल र जनताको भावना बुझेर काम गर्दा यो परिणाम प्राप्त गर्न सफल भएको उहाँको भनाइ छ ।

स्थानीय तहको वित्तीय प्रणाली व्यवस्थित, पारदर्शी, विधिसम्मत र प्रभावकारी बनाउन स्थानीय वित्त व्यवस्थापनको सम्भावित जोखिमका क्षेत्रहरूको पहिचान गरी त्यसको लेखाजोखाको माध्यमबाट स्थानीय तहको वित्तीय सुशासनलाई संस्थागत गर्न स्थानीय तह वित्तीय सुशासन जोखिम मूल्याङ्कन गरिँदै आएको छ । -राष्ट्रिय समाचार समिति (रासस)