साइन्स भनेको सरकारी विद्यालयमा पढ्नु हुँदैन र ? पूर्वि चितवनको नेपाल नमुना माविमा खुल्यो भर्ना

– हिरालाल आचार्य ‘डायमण्ड’
चितवन, असार २४ –
पूर्वि चितवनको रत्ननगर नगरपालिका– २ टाँडीमा रहेको सरकारी विद्यालय नेपाल नमुना माविमा कक्षा ११ मा भर्ना खुलेको छ ।

व्यवस्थापन, विज्ञान, शिक्षा तथा मानविकी विषयमा भर्ना खुलेको हो । गुणस्तरी शिक्षा हाम्रो प्रतिबद्धता भन्ने मुल नाराका साथ अघि बढिरहेको उक्त विद्यालयमा मन्टेश्वरीदेखि कक्षा १२ सम्म पढाइ हुने गरेको छ ।

कक्षा १ देखि १० सम्म निःशुल्क र कक्षा ११–१२ मा न्यून शुल्कमा शिक्षा प्रदान भइरहेको छ । सो विद्यालयमा प्राविधिक धारतर्फ कृषि तथा बाली विज्ञान र साधारण धारतर्फ विज्ञान, व्यवस्थापन, शिक्षा तथा मानविकी समूहमा विभिन्न ऐच्छिक विषयहरु रोजेर पढ्न पाइन्छ ।

प्रयोगात्मक कक्षा, एकाई, मासिक, त्रैमासिक परीक्षाको व्यवस्था र कमजोर विद्यार्थीहरुलाई अतिरिक्ति कक्षाको समेत व्यवस्था नेपाल नुमना माविमा छ । सरकारी भए पनि उक्त विद्यालयमा अंग्रेजी र नेपाली दुबै माध्यमबाट पढाइ हुने गर्दछ ।

यी लगायत अन्य थुप्रै सुविधाहरु (तल बुँदागत दिइएको छ) नेपाल नमुना माविमा छन् । मन्टेश्वरीदेखि १० कक्षा र प्लस २ मा व्यवस्थापन र शिक्षा तथा मानविकी विषय पढ्ने विद्यार्थीहरुको संख्या उल्लेखनीय छ ।

तर अत्याधुनिक ल्याब, योग्य र अनुभवी शिक्षकको व्यवस्था गरी साइन्स विषय समेत सुरु गरिएको उक्त विद्यालयमा साइन्स पढ्ने विद्यार्थीहरुको संख्या कम रहेको प्रधानाध्यापक बुद्धिराज सुवेदीले दुखेसो गरे । साइन्स भनेको महँगो कलेजमै पढ्नुपर्छ, निजीमै जानुपर्छ भन्ने मानसिकताले गर्दा सरकारी विद्यालय नेपाल नमुना माविमा साइन्स (विज्ञान) पढ्न विद्यार्थी तथा अभिभावकहरुले रुची नदेखाएको पाइएको छ ।

अहिले त प्रधानाध्यापक सुवेदीले अभिभावकहरुलाई सोध्ने गरेका छन्, ‘आफ्नो सामान्य जीविको पार्जनबाट आफ्नो पेट काटेर अनावश्यक रुपमा महङ्गो शुल्क तिरी किन नीजिमै पठाउनु हुन्छ ?’
सरकारी विद्यालयमा राज्यबाट अनुदान आउने हुँदा शुल्क कम लागेको बताउँदै प्रधानाध्यापक सुवेदीले साइन्स पढ्ने विद्यार्थीहरु पनि यहीँ भर्ना हुन आह्वान गरेका छन् ।

वि.संं २०१३ सालमा स्थापित चितवनकै पहिलो संघीय सामुदायिक नमुना विद्यालय भएकाले गुणस्तरीय शिक्षा प्रदानका लागि आवश्यक भौतिक पूर्वाधार, सक्षम तथा विज्ञ शिक्षक, कर्मचारी र उपयुक्त शैक्षिक वतावरण नेपाल नमुना माविमा छ ।

शिक्षा मन्त्रालयबाट लिइएको एम.बी.बी.एस. २०२३ प्रवेश परीक्षामा उक्त विद्यालयका विद्यार्थीहरु ऋषभ थापा मगर, शैलेश पाठक र दिक्षान दवाडीले पूर्ण छात्रवृत्तीमा नाम निकाल्न सफल भएका छन् । यस्तै बीई तर्फ हिमाल थापा मगर, रविन पाण्डे, सुदिप शर्मा र युकेश दुराले पनि पूर्ण छात्रवृत्तीमा नाम निकाली राज्यको सेवा सुविधामा पढिरहेका छन् । उनीहरु यस विद्यालयबाट शैक्षिक सत्र २०७९ सालमा विज्ञान समूहबाट उत्तीर्ण भएका विद्यार्थी हुन् । ‘यी कुराले पुष्टि गर्छ की हाम्रो विद्यालयमा साइन्स कस्तो पढाइ हुन्छ’ प्रधानाध्यापक सुवेदी भन्छन् ।’

अन्य सुविधाहरु :
– दक्ष एवम् अनुभवी शिक्षकहरूबाट पूर्ण पारिवारिक, स्वच्छ, सफा र प्राकृतिक एवम् बालमैत्री वातावरणमा पठनपाठन हुने ।
– खोज अनुसन्धान र व्यवहारिक शिक्षा प्रणालीमा जोड ।
– कक्षा १ देखि १० सम्म निःशुल्क र कक्षा ११–१२ मा न्यून शुल्कमा शिक्षा प्रदान गरिने ।
– सुविधासम्पन्न कक्षाकोठाको साथै आधुनिक, आरामदायी, बालमैत्री डेक्स बेन्चको व्यवस्था ।
– बाल एवम् अपाङ्गमैत्री शौचालयका साथै शुद्ध खानेपानीको व्यवस्था ।
– इन्टरनेट सुविधा ई–लाइब्रेरी विज्ञान कम्प्युटर तथा कृषि प्रयोगशाला, पर्याप्त खेलमैदान र स्वच्छ चमेना गृहको व्यवस्था ।
– विद्यालय नर्सको व्यवस्था, साना बाबुनानीहरूका लागि बाल उद्यानको साथै आराम कक्षको व्यवस्था ।
– अडियो भिजुअल प्रविधिमार्फत मनोरञ्जनात्मक वातावरणमा कक्षा सञ्चालन ।
– प्राथमिक तहका बालबालिकालाई निःशुल्क दिवा खाजाको व्यवस्था ।
– कृषि समूहतर्फ विद्यार्थीहरूको लागि पढ्दै कमाउँदै कार्यक्रम अन्तर्गत एवं प्रयोगात्मक कार्यका लागि टनेल सहितको पर्याप्त कृषि फिल्डको तथा ओजेटीको व्यवस्था ।
– विद्यालय बसको व्यवस्था ।
– प्रयोगात्मक कक्षा, एकाई, मासिक, त्रैमासिक परीक्षाको व्यवस्था र कमजोर विद्यार्थीहरुलाई अतिरिक्त कक्षाको व्यवस्था ।
– बालविकासका विद्यार्थीहरुको सुरक्षाको लागि स्मार्ट आईडि कार्डको व्यवस्था ।
– विद्यार्थीहरुको अन्तर्निहित प्रतिभा प्रष्फुटन गराउनका लागि अन्तर सदनात्मक एवम् नगरस्तरीय अतिरिक्त क्रियाकलापको व्यवस्था ।
– कक्षागत अभिभावक भेला एवम् विद्यालय सूचना अधिकारीको व्यवस्था ।
– वार्षिक विद्यार्थी तथा शिक्षक अवलोकन भ्रमणको व्यवस्था ।
– विद्यालय हाताभित्र सिसिटीभि क्यामेराबाट निगरानी गरिने ।