सांसद हरि ढकाललाई रत्ननगरमा स्वागत तथा सम्मान

चितवन । रत्ननगर नगरपालिका वडा नम्वर -१५ मा प्रतिनिधि सभा सदस्यमा निर्वाचित सांसद हरि ढकाललाई स्वागत तथा सम्मान गरिएको छ ।
वडाले आज बुधवार सांसद ढकाललाई स्वागत तथा सम्मान गरेको हो । रत्ननगर नगरपालिका -१५ वडाका वडाध्यक्ष आशिक तामाङले सांसद ढकाललाई स्वागत गरी विकास निर्माणको सम्भावनाको विषयमा जानकारी समेत गराएका थिए ।

सो अबसरमा सांसद ढकालले जनचाहना अनुसार आफुले काम गर्ने प्रतिबद्धता जनाए । संसदमा नीति र भूगोलमा थिति बसाल्ने जनचाहना रहेको भन्दै उनले आफ्नो प्राथमिकता रहेको बताए । सांसद ढकालले निर्बाचन क्षेत्रमा अलपत्र अबस्थामा रहेका आयोजनालाई पूर्ण गरी थप योजना ल्याउने प्रतिबद्धता जनाए । ग्रामिण क्षेत्रको विकासको लागि पूर्वाधार निर्माण, कृषि, शिक्षा र स्वास्थ्यमा जोड दिने उनको भनाई छ ।

वडा अध्यक्ष तामाङले नवनिर्वाचित सांसद ढकालबाट वडाबासीले ठुलो अपेक्षा गरेको भन्दै स्थानीय मागलाई सम्बोधन गर्ने गरी योजना आउनेमा आफु विश्वस्त रहेको बताए ।

कार्यक्रममा बोल्दै माधवपुर माविका निमित्त प्रधानाध्यापक शान्ता खत्रीले सामुदायिक बिद्यालय स्तरोन्नतिमा विशेष जोड दिनुपर्ने बताउनुभयो। विन्देश्वरी माविका अध्यक्ष पुरुषोत्तम कट्टेल, प्रधानाध्यापकका हरि खनाल, नमुना आधारभूत निमाविकी प्रधानाध्यापक शोभा श्रेष्ठ, विन्देश्वरी टोल विकास संस्थाका अध्यक्ष सीता भट्टराई, माधबपुर कृषि सहकारीका अध्यक्ष रेशमराज लामिछाने, कृष्णप्रसाद लामिछाने, चन्द्रप्रसाद लामिछाने लगायतले मन्तव्य राखेका थिए । वडा सचिव रुपबहादुर पण्डित क्षेत्रीले सञ्चालन गरेको कार्यक्रममा वडा सदस्य इमप्रसाद पन्तले स्वागत मन्तव्य राखेका थिए ।