भारतको उत्तराखंडमा बस दुर्घटना हुँदा ७ जनाको मृत्यु

काठमाडौं,पुस १५-
भारतको उत्तराखंडको अल्मोडा जिल्लामा यात्रुवहाक बस दुर्घटना हुँदा ७ जनाको मृत्यु भएको छ । दुर्घटनामा दुई महिलासहित १२ जना घाइते भएका छन् ।

भारतीय सञ्चार माध्यमका अनुसार प्रहरी प्रशासन घटनास्थलमा पुगेको छ । घाइतेहरुलाई अस्पताल पुर्‍याइएको छ ।

अल्मोडाको भिकियासेन इलाकामा पर्ने शिलापानीमा बस दुर्घटना भएको हो । बस भीरबाट खसेको थियो । अधिकारीका अनुसार बसमा १९ जना यात्रु सवार थिए । चालकले नियन्त्रण गुमाएपछि दुर्घटना भएको अनुमान गरिएको छ । मृत्यु हुनेमा ५ पुरुष र दुई महिला रहेका छन् । उनीहरु सबैको सनाखत भइसकेको भारतीय सञ्चार माध्यम अमरउजालाले जनाएको छ ।

भारतीय प्रधानमन्त्री नरेन्द्र मोदीको अफिसियल अकाउन्ट पीएमओ एक्स पोस्टमा दुर्घटनाप्रति दु:ख व्यक्त गरिएको छ ।