भदौ २३ गतेको प्रदर्शन शान्तिपूर्ण हुन्छ भन्ने आकलन थियो, परिस्थिति असामान्य बन्यो : रमेश लेखक

काठमाडौं पुस १४,

तत्कालीन गृहमन्त्री रमेश लेखकले भदौ २३ गते जेनजीले गरेका प्रदर्शन शान्तिपूर्ण हुने भनिए पनि अत्यन्त दु:खद घटना भएको बताएका छन् ।

पूर्वन्यायाधीश गौरीबहादुर कार्की नेतृत्वको आयोगमा बयान दिएर फर्किएपछि लेखकले पत्रकार सम्मेलन गर्दै आन्दोलनको उद्देश्य राम्रो भए पनि त्यसबाट उत्पन्न परिस्थिति असामान्य बनेको बताए ।
भदौ २२ गते साँझ ६ बजे केन्द्रीय सुरक्षा समितिको बैठक बसेको स्मरण गर्दै लेखकले त्यसअघि दूरसञ्चार प्राधिकरण र सूचना तथा सञ्चार प्रविधि मन्त्रालयका अधिकारीसँग छलफल गरेको बताए ।

उनले भने, ‘२३ गते हुने जेनजी आन्दोलनबारे सूचनाको संकलन र विश्लेषण भयो, त्यहाँ सबै सुरक्षा निकायले आपसी समन्वयमा परिचालन हुने निष्कर्षसहित बैठक टुंगियो ।’

लेखकले केन्द्रीय सुरक्षा समितिको बैठकमा हताहती र कोही पनि मान्छे मर्ने अवस्था नरहोस् भनेर निर्देशन दिएको बताए ।

‘जेनजी आन्दोलन कुनै राजनीतिक दलको आयोजनामा आन्दोलन नभएर घुसपैठ हुनसक्छ भनेर ख्याल गर्नुहोला भनेर सुरक्षा निकायलाई निर्देशन दिएको थिएँ,’ लेखकले भने, ‘त्यस बैठकमा अशान्ति हुने, हिंसात्मक घटना हुने, बल प्रयोग हुने कुनै खालका निर्णय भएको थिएन ।’