एनपिएलः फाइनलमा पुग्न विराटनगरलाई १३५ रनको लक्ष्य

काठमाडौँ, २५ मङ्सिरः 
दोस्रो संस्करणको नेपाल प्रिमियर लिग (एनपिएल) को दोस्रो क्वालिफायरमा लुम्बिनी लायन्सले विराटनगर किङससामु जितका लागि एक सय ३५ रनको लक्ष्य प्रस्तुत गरेको छ ।

कीर्तिपुरस्थित त्रिवि क्रिकेट मैदानमा टस हारेर पहिला ब्याटिङको निम्तो पाएको लुम्बिनी लायन्सले निर्धारित २० ओभरमा आठ विकेट गुमाउँदै एक सय ३४ रन बनायो । लुम्बिनिका लागि डार्शी शर्टले सर्वाधिक ४५ रनको योगदान दिए । उनले ४१ बलमा तीन चौका र एक छक्काको सहयोगमा ४५ रनको योगदान दिएका हुन् ।

त्यसैगरी कप्तान रोहितकुमार पौडेलले ३० बलमा दुई चौका र दुई छक्काको मद्दतमा ३४ रन बनाए । यस्तै निशोसन डिक्वेलाले २२ बलमा चार चौका प्रहार गर्दै २९ रन बनाए । रुबेल ट्रम्पलम्यानले अविजित  ११ रन जोडे ।

बलिङतर्फ विराटनगरका सुवास भण्डारी र प्रशित जिसिले समान तीन÷तीन तथा कप्तान सन्दीप लामिछानेले दुई विकेट लिए ।

यसअघि विराटनगर पहिलो क्वालिफायरमा सुदूरपश्चिमसँग पराजित भएको थियो । त्यस्तै लुम्बिनीले एलिमिनेटरमा काठमान्डु गोर्खाजलाई पराजित गरेसँगै यी दुई टोलीको दोस्रो क्वालिफायरमा भेट भएको हो । लिग चरणमा भने लुम्बिनीले विराटनगरलाई पाँच विकेटले पराजित गरेको थियो । यसअघि भएको पहिलो क्वालिफायरमा सुदुरपश्चिमले विराटनगरलाई पराजित गर्दै फाइनल यात्रा तय गरिसकेको छ । सुदुरपश्चिम पहिलो संस्करणको उपविजेतासमेत हो ।