१ कात्तिक, काभ्रेपलाञ्चोक ।
बोलेरो जीपले अनियन्त्रित भई बिजुलीको पोलमा ठोक्किंदा विद्युत सेवा अवरुद्ध भएको छ।
काभ्रेको मण्डनदेउपुर नगरपालिका-९, रानीटार क्षेत्रमा बिहान ९ : ३० बजेदेखि विद्युत सेवा अवरुद्ध भएको नेपाल विद्युत प्राधिकरण पाँचखाल वितरण केन्द्रका प्राविधिक कमल चौलागाईले जानकारी दिए ।
रानीटार स्थित ११ मिटरको सिमेन्टको पोलमा गाडीले ठक्कर दिँदा पोल भाँचिएका कारण मेलम्ची फिडर अन्तर्गत पर्ने मण्डन देउपुर नगरपालिकाका क्षेत्रहरूमा विद्युत आपूर्ति रोकिएको नेपाल विद्युत प्राधिकरण पाँचखाल वितरण केन्द्रले जनाएको छ।
क्षतिग्रस्त लाइनको मर्मत सम्भारको काम तत्काल सुरु गरिएको र सो कार्य सम्पन्न हुन करिब ३ देखि ४ घण्टा लाग्ने अनुमान गरिएको छ। मर्मत कार्य सकिएलगत्तै विद्युत सेवा सुचारु हुने प्राधिकरणले जानकारी दिएको छ।
विद्युत अवरुद्ध हुँदा स्थानीय बासिन्दा र त्यस क्षेत्रका व्यवसायीहरू प्रभावित भएका छन्। प्राधिकरणले मर्मत कार्यमा सहयोग पुर्याउन र धैर्य गर्न सबैलाई आग्रह गरेको छ।
Leave a Reply