पाँच मिनेट ढिला भएको भए मलाई मार्ने र देउवालाई घाइते बनाउने योजना रहेछः केपी

काठमाडौं, असोज ११-
नेकपा (एमाले) का अध्यक्ष केपी शर्मा ओलीले बालुवाटारबाट निस्कन ढिला भएको भए आफूलाई मार्ने र नेपाली कांग्रेसका सभापति शेरबहादुर देउवालाई घाइते बनाउने योजना रहेको दाबी गरेका छन्।

भक्तपुरको गुण्डुमा डेरा गरी बस्न थालेका अध्यक्ष ओलीले लोकतान्त्रिक आदिवासी जनजाति महासंघ नेपालका अध्यक्ष पासाङ शेर्पासहितको समूहसँगको भेटमा ओलीले गत भदौ २४ गते पाँच मिनेट मात्रै बालुवाटारबाट निस्कन ढिला भएको भए आफूलाई मार्ने योजना रहेको दाबी गरेका हुन्।

साथै ओलीले प्रदर्शनकारीहरूको नेपाली कांग्रेसका सभापति शेरबहादुर देउवालाई घाइते बनाउने योजना रहेको सुनाएका हुन्।

‘यसपटक पाँच मिनेट ढिला भएको भए, मार्ने नै थिए। शेरबहादुरजीलाई घाइते बनाउने र मलाई मार्ने खालकै योजना थियो,’ उनले भने। हठात् सत्ता नै पल्टाउने घटना भएकाले आफूले तयारी नै गर्न नपाएको उनको भनाइ थियो।

‘सेक्युरिटीमाथि मलाई अलिकति भरोसा भयो, सेक्युरिटीले हामी केही पनि गर्न सक्दैनौं, केही पनि गर्दैनौं भन्यो,’ उनले पासाङ शेर्पासहितको समूहसँग भने।