‘पुष्पा २’ को विशेष शोमा मृत्यु भएकी महिलाको परिवारलाई दिइयो २ करोड

काठमाडौं, पुस ११ –
दक्षिण भारतीय फिल्म ‘पुष्पा २’ को विशेष शोमा मृत्यु भएकी महिलाको परिवारलाई फिल्मका टिमले २ करोड भारू दिएका छन्।

अभिनेता अल्लू अर्जुनका बुबाका अनुसार अल्लू अर्जुनले मात्रै १ करोड भारू दिएका छन्। पुष्पाका निर्देशक सुकुमार र मैत्रेयी प्रोडक्सन हाउसले ५०/५० लाख भारू दिएका हुन्।

४ डिसेम्बरमा हैदराबादको थिएटरमा विशेष शो आयोजना गरिएको थियो। अल्लू अर्जुनलाई हेर्न दर्शकको भागदौड हुँदा एक महिलाको मृत्यु भएको थियो भने उनका छोरा गम्भीर घाइते भएका छन्। एक महिलाको मृत्युपछि उनका परिवारले थिएटर म्यानेजमेन्ट र अल्लू अर्जुनविरूद्ध उजुरी दिएका थिए।

केही दिनअघि हैदराबाद प्रहरीले अल्लू अर्जुनलाई पक्राउ पनि गरेको थियो। तर तेलंगना उच्च अदालतले उनलाई एक हप्ताका लागि धरौटीमा छाडेको हो।