Category: शिक्षा

महोत्तरी, १२ फागुन –
बर्दिबास नगरपालिकाले बौद्ध शिक्षा लागु गर्ने भएको छ । बौद्ध शिक्षा प्रारम्भ गर्न चाँडै कलेज स्थापनाको प्रक्रिया अघि बढाइने नगर कार्यपालिकाको कार्यालयले जनाएको हो । बुधबार लुम्बिनी बौद्ध विश्वविद्यालय र बर्दिबास नगरपालिकाबीच यससम्बन्धी सम्झौता भएपछि अब बौद्ध शिक्षाका लागि कलेज स्थापनाको प्रक्रिया अघि बढ्ने प्रमुख प्रशासकीय अधिकृत रेवतीप्रसाद पराजुलीले बताउनुभयो ।

“हाम्रो नगरपालिका र लुम्बिनी बौद्ध विश्वविद्यालयबीच बर्दिबासमा बौद्ध शिक्षा प्रारम्भ गर्ने सम्झौता भएको छ”, पराजुलीले भन्नुभयो, “अब बौद्ध शिक्षाका लागि कलेज स्थापनाको प्रक्रिया कार्यालयको शिक्षा शाखाले अघि बढाउने छ ।” बुधबार यससम्बन्धी सम्झौतामा नगरप्रमुख विदुरकुमार कार्की र लुम्बिनी बौद्ध विश्वविद्यालयका उपकुलपति प्राध्यापक डा हृदयरत्न वज्राचार्यले हस्ताक्षर गर्नुभएको पराजुलीले जानकारी दिनुभयो ।

बौद्ध शिक्षा लागू भएपछि यहाँ स्थापना हुने कलेजमा बौद्ध दर्शनसम्बन्धी ज्ञान, तालिम, खोज एवं अनुसन्धान गरिने छ । यो शिक्षाले आम नागरिकमा अष्टाङ्ग ध्यान, सम्यक जीवन र बौद्ध दर्शनका बहुआयामिक पक्षबारे चासो बढाउने यहाँका शिक्षाविद् बताउँछन् । “सुखद जीवन जिउने कलाबारे बौद्ध दर्शनले सुझाएको छ”, बर्दिबास जनता बहुमुखी क्याम्पसका प्राचार्य तोपबहादुर ठकुरी भन्नुहुन्छ, “यहाँ बौद्ध शिक्षाका लागि कलेज स्थापना हुनसके यसबारे सकारात्मक चासो बढ्ने छ ।”

बौद्ध शिक्षाबारे अहिले भएको सम्झौता आसन्न स्थानीय निर्वाचनको प्रचार नारामात्र नबनोस् भन्ने पनि यहाँका शिक्षाविद्को प्रतिक्रिया छ । “स्थानीयतहको निर्वाचन घोषणा भएको छ, यहाँको अहिलेको नगर नेतृत्वले ‘मैले यस्तो सम्झौता गरें’ भन्ने चुनावी प्रचारमात्र नगरोस्”, बर्दिबास–३ गौरीडाँडास्थित जनता माध्यमिक विद्यालयका अवकासप्राप्त प्रधानाध्यापक सरिता ढुङ्गाना भन्नुहुन्छ, “कलेज स्थापनाको इमान्दार प्रयत्न अघि बढोस्, जनताले देखिने गरी काम भएपछि गर्नेले त्यसको जस त पाइहाल्छन् ।”

यसअघि नगरपालिकाले आउँदो शैक्षिकसत्रदेखि लागु हुने गरी स्थानीय पाठ्यक्रम लागू गरिसकेको छ । कक्षा १ देखि ८ सम्म पठनपाठन हुने स्थानीय पाठ्यक्रममा ‘बर्दिबास ज्ञानमाला’ नाउँको पुस्तक तयार भएको छ । यो शैक्षिकसत्र २०७९ बाट लागू हुँदैछ, कक्षा १ देखि ८ सम्मको ‘बर्दिबास ज्ञानमाला’ बाट विद्यार्थीले आफ्नो ठाउँको भूगोल, भेषभूषा, भाषाभाषी, रीतिथिति र स्थानीय सम्भावनाबारे आधारभूत ज्ञान पाउनेछन् । स्थानीय पाठ्यक्रम लागू गर्ने बर्दिबास अहिलेसम्म जिल्लाको एकमात्र स्थानीयतह हो ।

नगरक्षेत्रमा आधारभूत र माध्यमिक गरी ५५ सामुदायिक विद्यालय छन् । त्यसैगरी कृषि सङ्कायको अध्ययन अध्यापन हुने प्राकृतिक स्रोत साधन कलेज सञ्चालित छ । यसबाहेक शिक्षाशास्त्रमा स्नातकोत्तर र वाणिज्य शास्त्रमा स्नातक तहसम्मको अध्ययन हुने बर्दिबास जनता बहुमुखी क्याम्पस एवं १० भन्दा बढी प्राविधिक विषयको पठनपाठन हुने निर्मल लामा बहुप्राविधिक शिक्षालय छ । नगरक्षेत्रका सात माध्यमिक विद्यालयले प्राविधिक शिक्षा तथा व्यावसायिक तालिम परिषद् (सिटिइभिटी) को सम्बन्धनमा पशुविज्ञान, नापी, कम्प्युटर विज्ञान, फरेष्ट्री, इञ्जिनियरिङ र कृषिसम्बन्धी पठनपाठन गराइ रहेका छन् । (रासस)

कास्की, ८ फागुन –
बजारको मागका आधारमा दक्ष प्राविधिक जनशक्ति उत्पादनको लक्ष्यसहित पोखरा महानगरपालिकाले स्थापना गरेको ‘गण्डकी बहुप्राविधिक शिक्षालय’को आफ्नै सुविधासम्पन्न भवन निर्माण सुरु गरिएको छ ।

महानगरले प्राविधिक शिक्षा तथा व्यावसायिक तालिम परिषद् (सिटीइभिटी)को साझेदारीमा अहिले पोखरा–२९ को जनप्रकाश माध्यमिक विद्यालयमा शैक्षिक कार्यक्रम सञ्चालन गरिरहेकामा सोही वडाको खल्याणमा आधुनिक भवन निर्माणका लागि शनिबार शिलान्यास गरी काम सुरु गरिएको हो ।

रु ११ करोड ४२ लाख लागतमा निर्माण हुने भवन आगामी विसं २०८० फागुन २९ गतेसम्म सम्पन्न गर्ने गरी भूमि इन्फास्ट्रक्चर प्रालिसँग ठेक्का सम्झौता भएको महानगरका इञ्जीनियर लक्ष्मीप्रसाद गौतमले जानकारी दिनुभयो । उहाँका अनुसार भवन ४० हजार ४९२ स्क्वायर फिटमा रहनेछ । सङ्घ सरकारको विशेष अनुदान र महानगरपालिकाको लगानीमा भवन बन्न लागेको हो ।

गत वर्षदेखि शिक्षालयले ‘डिप्लोमा इन अटोमोबाइल इञ्जीनियरिङ’ र ‘डिप्लोमा इन सिभिल इञ्जीनियरिङ’को तीनवर्षे कोर्षको पढाइ सञ्चालन गरेको हो । सिभिल इञ्जीनियरिङ अधिकांश प्राविधिक शिक्षालयहरूमा पढाइ हुने भए पनि अटोमोबाइल पढाइ हुने कलेज तथा क्याम्पस नगन्य छन् । इञ्जीनियरिङ अध्ययन संस्थानअन्तर्गतको पश्चिमाञ्चल क्याम्पसमा केही वर्षअघि अटोमोबाइल विषय अध्यापन गरिए पनि हाल सोको पठनपाठन हुँदैन ।

विशेषगरी विपन्न, दलित, उत्पीडित समाजमा पछि परेका वर्गको क्षमता विकास, सीप तालिमको माध्यमद्वारा सशक्तीकरण गर्दै रोजगारमूलक स्वरोजगार र उद्यमशीलताको विकास गर्न शिक्षालयले भूमिका खेल्ने शिक्षालयका निर्देशक लक्ष्मण तिमिल्सिनाले बताउनुभयो । उहाँले आफ्नै भवन निर्माणपछि अध्ययन–अध्यापनसहित प्रशासनिक काम सहज हुने विश्वास व्यक्त गर्नुभयो ।

तीनवर्षे कोर्षका लागि हाल शिक्षालयमा ४८ जनाको कोटा निर्धारण गरी छात्रवृत्तिको व्यवस्थासहित अध्यापन भइरहेको छ । शिक्षालयमा १० कोटा पूर्ण छात्रवृत्ति, छवटा सहुलियत र ३२ कोटा खुलातर्फका रहेका छन् । यस वर्ष दुई प्राविधिक विषयको अध्यापन सुरू गरिए पनि शिक्षालयको पूर्वाधार निर्माण सम्पन्न भएपछि प्राविधिकतर्पmका डिप्लोमा इन जियोमेटिक इञ्जीनियरिङ, फरेस्टी, फार्मेसी विषयमा समेत कक्षा सञ्चालन गर्ने योजना रहेको शैक्षिक प्रमुख सरोज अधिकारीले जानकारी दिनुभयो ।

सांसद खगराज अधिकारीले भवन शिलान्यास गर्दै आर्थिक विकासका लागि गुणस्तरीय र प्राविधिक शिक्षा महत्वपूर्ण रहेको बताउनुभयो । (रासस)