Category: Banner तल ताजा समाचार

झापा, ५ वैशाख-

गौरीगञ्ज-१ का खगेन्द्र श्रेष्ठले बगरमा ‘पैसा’ फलाउने उद्देश्यले माई नदीको बगरमा खरबुजा खेती लगाएका छन् । गत वर्षदेखि खरबुजा खेती सुरु गरेका खगेन्द्रले यसपटक भने खरबुजा खेतीबाट केही आम्दानी गर्ने सोचेका थिए ।

वैशाख पहिलो साताबाट खरबुजा टिप्न योग्य हुन्छ । गत वर्ष यही समयमा कोरोना महामारी फैलिएपछि लकडाउन हुँदा उत्पादिन खरबुजा बजारसम्म पुर्‍याउन सकेका थिएनन् । पाँच बिघा बगर क्षेत्रमा लगाएको खरबुजाबाट लगानी उठाउन पनि हम्मेहम्मे परेको थियो । ‘गत वर्षदेखि बगरमा पनि केही गर्न सकिन्छ कि भनेर खरबुजा खेती गर्न थालेको हुँ,’ उनी भन्छन्, ‘गत वर्ष पाँच लाख लगानी गरेर खरबुजा लगाएँ । तर, लकडाउनले बगरमै खरबुजा कुहिएन अवस्था आयो । बल्लतल्ल लगानी उठाएँ ।’

यसपटक खरबुजा राम्रो फलेको थियो । मिहिनेतअनुसार कमाई हुनेमा उनी ढुक्क थिए । खरबुजा पाकेर टिप्ने बेला भएको थियो । तर, चैत अन्तिमसाता आएको असिना पानीले उनको खरबुजा खेतीमा क्षति गर्‍यो । पाँच लाख खर्च गरेर पाँच बिघामा लगाएको खरबुजा असिनाले कामै नलाग्ने गरी बिगारेको खगेन्द्र बताउँछन् । ‘असिनाले अधिकांश फुटाएको छ । १ वैशाखदेखि टिप्न थालेको । धेरै त काम नलाग्ने भएको छ । काम लाग्ने बजारमा पठाउँदैछु,’ उनी भन्छन्, ‘राम्रो फलेको बेला असिनाले काम नलाग्ने बनायो । यसपटक त लगानी पनि उठ्दैन कि भन्ने डर छ ।’

श्रेष्ठजस्ता किसानलाई सधैँ समस्या हुने गरेको छ । प्राकृतिक प्रकोपले सधैँ उठाउन लागेको बालीमा क्षति पुर्‍याएको गरेको छ । गत कात्तिकमा खगेन्द्रले लगाएको दुई बिघा धान खेतामा क्षति पुर्‍याएको थियो । ‘खेलीमा लगानी गरेको उठाउनै नपाएपछि कसरी कृषि गर्ने ?,’उनी भन्छन्, ‘धानको क्षतिमा सरकारले केही हेर्छ कि भनेको अहिलेसम्म केही गरेन । धानको क्षतिको फर्म चाहिँ भरेको छ ।’

मोरङका मेघराज चौधरी ६ महिनादेखि गौरीगञ्ज-२ स्थित भाकुरमारमा माई नदीको बगरमा छन् । नदीले बगर बनाएको जग्गा भाडामा लिए । बगरमा मल लगाए । खरबुजाको बिउ रोपे । उनले करिब चार हजार खरबुजाका बोट रोपे । मलजल गरे । ६ महिना बगरमै बसेर यसलाई स्याहार पनि गरे । यसका लागि उनले ऋण गरेर तीन लाख खर्चेका छन् । तर, फल आउने बेलामा भने असिनाले सखाप बनायो ।

‘६ वर्षदेखि म माईको बगरमा खरबुजा खेती गर्दै आएको छु । पहिला त राम्रो हुन्थ्यो । अहिले त कहिले लकडाउन हुन्छ कहिले के,’ उनी भन्छन्, ‘यसपटक असिनाले सखाब बनायो । ६ महिना मिहिनेत गर्‍यो फल पाउने बेलामा यस्तो भएपछि के गर्ने ? पाकेको खरबुजा सबै असिनाले फुटायो । यसपटक त लगानी पनि नउठ्ने भयो ।’

असिनाले क्षति पुर्‍याएर बाँकी रहेका खरबुजा उनी धमाधम टिप्दैछन् । अहिले बगरबाटै प्रतिकेजी २० रुपैयाँसम्म खरबुजा बिक्री भइरहेको छ । ‘बाँकी रहेकोले कतै लगानी उठ्छ कि, लगानी उठेन भने साहुको ऋण कसरी तिर्ने,’ उनी भन्छन् ।- न्युज कारखाना

मोहन जोशी
धनगढी, ५ वैशाख-

चुनावी तालमेलका लागि पाँच दलीय गठबन्धनबीच पटक पटक भएको छलफल निश्कर्षविहीन बन्दै जाँदा कैलालीमा दलहररुबीच थप अविश्वासको वातावरण बन्न थालेको छ ।

मुख्यगरी नेपाली कांग्रेस, नेकपा माओवादी र नेकपा एकीकृत समाजवादी पार्टी स्थानीय तहमा आ-आफ्नो दावीबाट पछि नहटेपछि सहमतिको वातावरण बन्न नसकेको हाे । समहति नहुँदा गठबन्धनमा आवद्ध दलहरूनै एकअर्का प्रति शंका उपशंका गर्न थालेका छन् ।

कैलालीमा नेकपा एसले तुलनात्मक रुपमा धेरै स्थानीय तहमा भाग खाेजेकाे भन्दै कांग्रेस र माओवादी रुष्ट बनेकाे हाे । जसका कारण नेकपा एस पनि दुई दल मिल्न सक्ने भन्दै त्रसित बन्न थालेको छ । यही कारण नेकपा एसले अन्य साना वाम दलसँग चुनावी तालमेलका लागि छलफल गर्न थालेको छ ।

राष्ट्रिय जनमोर्चालगायतका दलसँग नेकपा एसले गठबन्धन बनाएर अघि बढौँ भन्ने प्रस्ताव समेत गरेकाे स्राेतकाे दावी छ । श्रोतका अनुसार नेकपा एसले आइतबार मात्रै नेकपा माओवादी केन्द्र, राष्ट्रिय जनमोर्चालगायत कम्युनिष्ट पार्टीसँग वाम एकता गरेर चुनावमा जाने प्रस्ताव राखेको छ । त्यसका लागि नेकपा एसले आन्तरिक छलफल पनि अघि बढाएको छ ।

‘कांग्रेस र माओवादी मिल्न सक्ने नेकपा एसको आशंका पनि छ । गठबन्धनको संयुक्त बैठकमा पनि कांग्रेस र माओवादी केन्द्रको कुरा एउटै हुने गरेको थियो,’ नेकपा एसका एक नेताले भने, ‘यसबाट उनीहरू मिले जस्तो देखिन्छ, दुई पार्टी मिले हामी पनि आफ्नै तरिकाले अघि बढ्छौं ।’

तालमेल सम्मानजनक हुनुपर्छ : नेकपा एस

नेकपा एकीकृत समाजवादी पार्टी कैलालीका अध्यक्ष भैरव रावलले चुनावी तालमेल गर्दा सम्मानजनक व्यवहार हुनु पर्ने बताए । नेकपा एस पहिलो पटक चुनावमा जान लागेको भन्दै उनले अहिलेनै हामीलाई कम्जोर ठान्नु कांग्रेस माओवादीको गलत आंकलन हाे । ‘२०७४ सालको स्थानीय चुनावमा कैलालीका १३ मध्ये एमालले मात्रै सात पालिकामा जित हात पारेको थियो,’ उनले भने एमालेलाई जिताउन भूमसका खेल्ने धेरै नेता कार्यकर्ता नेकपा एसमा छन्, जिल्लामा हाम्रो उपस्थिति बलियो छ, त्यसैले हामीलाई कम्जोर नठाने हुन्छ ।’ कांग्रेस र माओवादीलाई स्थापित गर्न नेकपा एसले गरेको त्यागको पनि सम्मान हुनुपर्ने उनको भनाइ छ ।

गठबन्धनमै रहेको नेपाली कांग्रेस पनि वाम गठबन्धन हुन सक्ने भन्दै सशंकित देखिन्छ । गठबन्धनका हरेक बैठकमा कांग्रेस र माओवादी केन्द्र एउटै कित्तामा उभिए पनि कम्युनिष्टहरू जतिसुकै बेला मिल्न सक्ने भन्दै कांग्रेस एक्लै चुनावमा जान समेत आन्तरिक तयारीमा रहेकाे श्रोतको भनाइ छ ।

कांग्रेस कैलालीको निर्वाचन प्रचारप्रचार समितिका एक सदस्यका अनुसार वाम गठबन्धनका लागि भित्रभित्रै नेकपा एस, माओवादी केन्द्र र अन्य कम्युनिष्ट पार्टीबीच छलफल भइरहेको खबर आएपछि कांग्रेसले एक्लै चुनाव लड्ने गरी आन्तरिक तयारी थालेको हो । केन्द्रबाट सहमति भएर आएका स्थानीय तहबाहेकमा कांग्रेस एक्लै चुनाव लड्न सक्ने ती नेताले बताए । तर, केन्द्रले सहमति गर्न ढिलाई गर्दा जिल्लामा योजना बनाउन समस्या भइरहेको उनकाे भनाइ छ ।

पर्ख र हेरको स्थितिमा माओवादी केन्द्र

नेकपा माओवादी केन्द्र भने पर्ख र हेरको स्थितिमा छ । आफूले जितेका स्थानमा अरुलाई नेतृत्व नदिने स्पष्ट पारेर बसेको माओवादी केन्द्र अन्य पालिकाको हकमा बढी भन्दा बढी स्थानको नेतृत्व लिन दाउमा छ । तर, अहिलेसम्म गठबन्धनबाहेक तालमेलका लागि अन्य छुट्टै दलसँग छलफल नभएको नेकपा माओवादी केन्द्रका कैलाली संयोजक हरि ज्ञावाली बताउँछन् । ‘दलहरू आ-आफ्नै अडानमा रहेका कारण कैलालीमा सहमति हुन सकिरहेको छैन,’ संयोजक ज्ञावालीले भने, ‘सहमति नभए हामी एक्लै पनि चुनाव लड्न सक्छौं वा अन्य पार्टीसँग पनि तालमेल हुन सक्ला तर अहिलेसम्म त्यतातर्फ छलफल भएको छैन ।’

कैलालीका १३ स्थानीय तह मध्ये नेपाली कांग्रेसले ११, माओवादी केन्द्रले ६, नेकपा एकीकृत समाजवादी पार्टीले चार र राष्ट्रिय जनमोर्चाले एक स्थानीय तहमा नेतृत्व दावी गर्दै आएका छन् ।

केन्द्रमा शत्तारुढ पार्टीको गठबन्धनमै रहेको जनता समाजवादी पार्टी (जसपा)ले कैलालीमा भने गठबन्धन तोडेर अन्य केही क्षेत्रीय पार्टीसँग गठबन्धन गरेर जाने निर्णय नै गरिसकेको छ ।- न्युज कारखाना

काठमाडौं, ५ वैशाख-

माओवादी केन्द्रका अध्यक्ष पुष्पकमल दाहाल प्रचण्डले आफूहरू भरतपुर महानगरपालिका नै चाहिन्छ भन्ने अडानमा नरहेको बताएका छन् । पाँच दलीय गठबन्धनमा जुन जुन क्षेत्रमा सहमति हुन्छ त्यहीअनुसार अगाडि बढ्ने उनको भनाइ छ ।

पेरिसडाँडामा साेमबार आयोजित पत्रकार सम्मेलनमा बोल्दै अध्यक्ष प्रचण्डले भने, ‘हामीले भरतपुर महानगरपालिका नै चाहिन्छ भनेका छैनौं । हामीलाई काठमाडौं भए पनि हुन्छ । अरू कुनै महानगरपालिका भए पनि हुन्छ । बाहिर भनेजस्तो हामीले भरतपुर नै चाहिन्छ, रेणु नै चाहिन्छ भनेका छैनौं ।’

महानगरपालिको विषयमा सहमति नजिक पुगिसकेको भन्दै उनले उपमहानगरपालिकाको विषयमा पनि सहमतिअनुसार नै अगाडि बढ्ने बताए । अहिले पाँचदलीय गठबन्धनको बैठक र कार्यदलको बैठकमा छलफल भइरहेको र आजै वा भोलिसम्ममा टुंगोमा पुगिने बताए ।- न्युज कारखाना

काठमाडौं, ५ वैशाख-

नेकपा माओवादी केन्द्रका अध्यक्ष पुष्पकमल दाहाल प्रचण्डले स्थानीय तह निर्वाचन मिति कुनै पनि हालत नसर्ने बताएका छन् । पेरिसडाँडामा आयोजित पत्रकार सम्मेलनमार्फत उनले चुनाव सर्ने हल्ला फैलिरहेको भन्दै तोकिएकै मितिमा चुनाव हुने प्रष्ट पारे ।

‘निर्वाच सर्दैन् । ३० वैशाखमै निर्वाचन हुन्छ । गठबन्धनमा आबद्ध दलहरू निर्वाचनको तयारीमा केन्द्रित भएर लागेका छौं । आम मतदातालाई म आ-आफ्नो ठाउँबाट निर्वाचनमा सहयोग गर्न आग्रह गर्दछु,’ प्रचण्डले भने ।

निर्वाचनको मिति सर्ने खेलमा पाँच दलीय गठबन्धन नै लागेको भन्दै हल्ला फैलाइएको भन्दै उनले कुनै पनि हालतमा निर्वाचन नसर्ने प्रष्ट पारे ।- न्युज कारखाना