देश जलाउनेहरू नै अहिले सरकार चलाउन भनेर आए : केपी ओली

काठमाडौँ २४ कात्तिक
नेकपा एमालेका अध्यक्ष केपी ओलीले जेन-जी आन्दोलनका नाममा देशलाई अस्थिरताको बाटोमा धकेल्ने प्रयास भएको बताएका छन्।

काठमाडौंमा आइतबार राष्ट्रिय युवा संघ नेपालको पूर्ण बैठकमा उनले जेनजी आन्दोलनका नाममा असंवैधानिक तवरले सरकार गठनका साथै प्रतिनिधिसभा विघटन गरेर देशलाई अस्थिरताको बाटोमा धकेल्ने प्रयास भएको बताए। उनले देश जलाउनेहरू नै अहिले देश चलाउन आएको जिकिर गरे।

अहिलेको परिस्थिति राष्ट्रका लागि अनिष्ट परिस्थिति भएको भन्दै उनले यो परिस्थितिलाई लामो समय जान दिनु नहुने धारणा राखे। अहिले विभिन्न प्रकारका आपराधिक तत्त्वबाट जनता अतंकित भएकाले उनीहरूलाई सुरक्षाको प्रत्याभूति दिने जिम्मा युवाको काँधमा आएको ओलीले बताए।