रास्वपा नेता–कार्यकर्ताले ज्यान मार्ने धम्की दिएपछि जेलरले रविको नक्कली पत्रमा हस्ताक्षर गरेको खुलासा

काठमाडौं–
राष्ट्रिय स्वतन्त्र पार्टी (रास्वपा)का सभापति रवि लामिछानेले नख्खु कारागारका जेलर सत्यराज जोशीको बयानसँग विपरीत अभिव्यक्ति दिएका छन् ।

सहकारी प्रकरणमा थुनामा रहेकै अवस्थामा उनले बुधबार गौरीबहादुर कार्की नेतृत्वको उच्चस्तरीय जाँचबुझ आयोगमा करिब सात घण्टा १५ मिनेट बयान दिएका हुन् ।

लामिछानेका अनुसार भदौ २४ मा जेनजी आन्दोलन नियन्त्रणबाहिर गएपछि ‘माथिबाट आदेश आएर’ आफूलाई जेलबाट रिहा गरिएको थियो ।

उनले उपसभापति डीपी अर्याल र पत्नी निकितालाई पहिल्यै बोलाइएको भन्दै डीपी अर्याल र मेरी श्रीमतीलाई खबर गरेर बोलाउनुभएको रहेछ भनेका छन् ।

उनका अनुसार कारागार बाहिर सवा घण्टा पर्खिएर उनले आन्दोलनकारीहरूलाई माइकमार्फत सम्झाउने प्रयास गरेका थिए ।

तर, जेलर जोशीले भने प्रदर्शनकारीले कारागार घेरेर लामिछानेलाई निकालिसकेपछि डेढ घण्टापछि मात्रै आफूलाई पत्रमा हस्ताक्षर गराइएको बताएका छन् ।

जोशीका अनुसार रास्वपा नेता–कार्यकर्ताले ज्यान मार्ने धम्की दिएपछि पत्र नपढीकनै हस्ताक्षर गरेका थिए ।

उक्त पत्रमा गृह सचिवको आदेशमा लामिछानेलाई थुनामुक्त गरिएको उल्लेख छ र सहकारी मुद्दालाई राजनीतिक रूपमा हेरिएको संकेत गरिएको थियो ।

रिहाइपछि आफूले तीनवटै सुरक्षा निकायका प्रमुख र अदालतलाई इमेलमार्फत जानकारी गराएको लामिछानेले बताएका छन् ।

उनले पत्रबारे आफ्नो विरुद्ध गलत प्रचार गरिएको दाबी गर्दै भने, ‘माथि अफवाह फैलाइयो ।’

आयोगका एक पदाधिकारीका अनुसार लामिछानेको बयान प्रक्रिया बुधबार पूरा भएको छ ।