सनराइज स्कुलको ३८औँ वार्षिकोत्सव, ७२ जनाले गरे रक्तदान

चितवन, ११ मङ्सिरः
युवा रेडक्रस सर्कल सनराइज इङ्ग्लिस सेकेन्डरी स्कुलले विद्यालयको ३८औँ वार्षिकोत्सवको अवसर पारेर ४८औँ खुल्ला रक्तदान कार्यक्रम सम्पन्न गरेको छ ।

उक्त कार्यक्रमका अध्यक्ष हेरी न्यौपानेको सभापतित्व तथा सनराइज स्कुल चितवन प्रा.लि.का अध्यक्ष हेमराज शर्मा, विद्यालय व्यवस्थापन समितिका अध्यक्ष रामजी अर्याल, विद्यालयका प्रिन्सिपल शिवकुमार बगाले लगायतको आतिथ्यमा सम्पन्न भएको हो ।

रक्तदान कार्यक्रमका संयोजक अर्जुन पौडेलको संयोजनमा सञ्चालित उक्त कार्यक्रममा विद्यालयका सह–प्राचार्य भूमिराज तिवारीले रक्तदाताहरूलाई स्वागत गर्दै रक्तदानको महत्वबारे प्रकाश पार्दै विद्यालयले आयोजना गर्ने विभिन्न कार्यक्रमहरूमा मध्ये अझ यो रक्तदान पुण्य कार्य भएको बताए ।

सनराइज स्कुल चितवन प्रा.लि.का अध्यक्ष तथा कार्यक्रमका अतिथि हेमराज शर्मालाई ब्लड ब्याग हस्तान्तरण गरेर शुभारम्भ गरिएको उक्त कार्यक्रममा २३ जना महिला सहित ७२ जनाले रक्तदान गरे । उक्त कार्यक्रममा विद्यालयका कक्षा ११ र १२ मा अध्ययनरत विद्यार्थीको उल्लेख्य सहभागिता रहेको थियो ।