Category: कालिका

चितवन,भदौ ५-

भैसी चराउन जाँदा चितवनको खगेरी खोलामा बेपत्ता भएका पुरुषको शव फेला परेको छ । बुधबार दिउसो २ बजेको समयमा कालिका नगरपालिका ५ खगेरी खोलास्थित कमिनी घाटमा भैसी चराउन जाने क्रममा कालिका नगरपालिका ५ भिमवली पार्कका ७२ वर्षिय डकुवा महतोलाई एक्कासी आएको बाढीले बगाएको थियो । उनको शव आज (बिहिबार) फेला परेको जिल्ला प्रहरी कार्यालय चितवनले जानकारी दिएको छ ।

उनको खोजीका लागि नेपाल प्रहरीको विपद् व्यवस्थापन टोली खटिएको थियो । उनको शव परीक्षणका लागि भरतपुर अस्पतालको शवगृहमा राखिएको छ ।

कालिका, जेठ ७ –
चितवनका सातवटा स्थानीय तहमध्ये कालिका नगरपालिका सबैभन्दा कम अधावधिक बेरूजु कायम भएको छ । यस पालिका हाल नेपालका ७५३ स्थानीय तहहरू मध्ये सबैभन्दा कम बेरूजु भएको शिर्ष १० पालिका भित्र सूचीकृत भएको छ । २०७१ सालमा नगरपालिका स्थापना भएसंगै आर्थिक वर्ष २०७९/०८० सम्म कालिका नगरपालिकाको कुल बेरूजु रु २० करोड भएकोमा हालको स्थानीय तहको दोस्रो कार्यकालको जनप्रतिनिधि आएसंगै बेरुजु घटाउन प्राथमिकता राखि विभिन्न कार्यक्रमहरु गरिएको जनाएको छ ।

लेखा समितिका संयोजक टिकाराम रेग्मीका अनुसार विभिन्न असुल गर्नुपर्ने बेरुजु रकम असुल गरी नगरपालिकाको खातामा जम्मा गरिएको छ । पेश्की रकम फर्छाैट गरेको तथा नगरपालिकाले आवश्यक विभिन्न कानुन तथा कार्यविधि निर्माण गरेकोले रु १५ करोड ६६ लाख बेरुजु फर्छौट गरी महालेखा परिक्षक कार्यालयको २०८१ सालमा प्रकाशित (२०७९/०८०) तथ्याङक अनुसार हाल रु ४ करोड ३३ लाख ४४ हजार बेरुजु कायम भएको महालेखा परिक्षकको प्रतिवेदनमा उल्लेख गरिएको रेग्मीले बताए ।

आर्थिक वर्ष २०७९/०८० सम्मको महालेखा परिक्षकको प्रतिवेदनमा देखाइएको तथ्याङक अनुसार कालिका नगरपालिकाको हाल रु ४ करोड ३३ लाख ४४ हजार बेरुजु बाँकी छ । जुन चितवन जिल्लामा सबैभन्दा कम हो । इच्छाकामना गाउँपालिकाको रु १० करोड ८० लाख ६४ हजार दोस्रो, खैरहनी नगरपालिकाको रु ११ करोड ८४ लाख ९२ हजार तेस्रो, रत्ननगर नगरपालिकाको रु १६ करोड १८ लाख ८९ हजार चौथो, राप्ती नगरपालिकाको १९ करोड २९ लाख ९४ हजार पाँचौ, माडी नगरपालिकाको ४६ करोड १५ हजार छैठौं र भरतपुर महानगरपालिकाको ९३ करोड ५० लाख २९ हजार सबैभन्दा धेरै कुल बेरुजु बाँकी रहेकाले सातौं स्थानमा छ ।

चितवन जिल्लाकै सबैभन्दा कम बेरुजु कायम गर्न सफल भएको कालिकाका नगर प्रमुख विनोद रेग्मीले बताए । नगरपालिको सम्पूर्ण पक्षमा साना साना सुधार गरिरहेको बताउँदै उनले कानुनहरुको पालना गरेको प्रतिक्रिया दिए । कालिका नगरपालिकाका वरिष्ठ लेखा अधिकृत ऋषि प्रसाद कडुवालका अनुसार नगरपालिकाले बजेट तर्जुमा गर्दा र खर्च गर्दा नेपाल सरकारको सम्पूर्ण कानुनहरु पालना गरेको र नगरपालिकाले आफैले बनाउनु पर्ने कानुन, कार्यबिधिहरु र मापदण्डहरु बनाएकाले बेरुजु न्यूनीकरण सम्भव भएको हो ।

चितवन, पुष ५ –
नेकपा (एमाले) कालिका नगरपालिका चितवनको दोश्रो नगर अधिवेशन सुरु भएको छ ।

३५१ जना प्रतिनिधिसहित हजारौंका उपस्थितिमा सडकमा र्यालीसहित उल्लासमय तरिकाले अधिवेशन सुरु भएको हो । अधिवेशनको खुलासत्र सकिएर आजै बन्दसत्र समेत सुरु भइसकेको एमाले चितवनका प्रचार विभाग प्रमुख प्रकाश आचार्यले जानकारी दिए ।

सकेसम्म सर्वसम्मत नेतृत्व चयन गर्ने प्रयासमा नेताहरु लागेका छन् । बन्दसत्रका लागि ७ सदस्यीय अध्यक्ष मण्डल बनाइएको छ । कालिका नगर इन्चार्ज एवम् बागमती प्रदेश सदस्य गोपी श्रेष्ठ अध्यक्ष र विभिन्न तहका एमाले नेताहरु दिवश पाण्डे, विनोद रेग्मी, विमला श्रेष्ठ, टिका रिजाल, प्रकाश खनाल शैलेश र जयचन्द्र चौधरी सदस्य रहने गरी अध्यक्ष मण्डल बनाइएको छ ।

नगर कमिटी अध्यक्ष केशव लामाको अध्यक्षतामा सम्पन्न अधिवेशनको खुलासत्रमा नेकपा एमाले पोलिट ब्युरो सदस्य एवम् चितवन इन्चार्ज देवी ज्ञवाली, एमाले केन्द्रीय सदस्य जेएन थपलिया, संविधान सभा सदस्य एवम् एमाले केन्द्रीय सदस्य कृष्णभक्त पोखेल, केन्द्रीय सदस्यहरु प्रभा बराल, यम बहादुर परियार, प्रदेश कमिटी उपाध्यक्ष दावा दोर्जे लामा, एमाले चितवनका अध्यक्ष कमलराज पाठक, सचिव प्रकाश ढुंगाना, सहसचिवहरु मिन बहादुर परियार, ज्वालापुरी वन सहित जिल्ला कमिटीका नेताहरु, विभिन्न पालिका कमिटीका नेता कार्यकर्ता, जनवर्गीय संगठनका नेता कार्यकर्ता लगायत स्थानीय नगरबासीहरुको उल्लासमय उपस्थिति रहेको थियो ।