काठमाडौँ, जेठ ३१-
दक्षिणी अमेरिकी राज्य टेक्सासको सान एन्टोनियो सहरमा भारी वर्षापछि आएको आकस्मिक बाढीका कारण कम्तिमा ११ जनाको मृत्यु भएको छ भने धेरै व्यक्ति अझै बेपत्ता छन्।
सान एन्टोनियो फायर विभागका अनुसार बिहीबार बिहानदेखि सुरु भएको बाढीमा ७ इन्चभन्दा बढी पानी परेको थियो। त्यसपछि सडकमा पानी जमेर सवारी साधनहरू बगाएको थियो। बेक्सार काउन्टी मेडिकल परीक्षकको कार्यालयले मृतकहरू २८ देखि ५५ वर्ष उमेर समूहका भएको पुष्टि गरेको छ।
सान एन्टोनियो फायर विभागले सलाडो क्रीक नजिकैको पेरिन बेइटेल र लियोन क्रीक नजिकैको हाइवे ९० र कालाघान रोड क्षेत्रमा खोजी कार्यलाई केन्द्रित गरेको छ। सान एन्टोनियोका मेयर रोन निरेनबर्गले सामाजिक सञ्जाल एक्समा शोक व्यक्त गरेका छन्। बाढी प्रभावित क्षेत्रमा उद्धार कार्य जारी छ।
वैज्ञानिकहरूले मानव निर्मित जीवाश्म इन्धन उत्सर्जनले जलवायु परिवर्तनलाई तीव्र बनाएको र यसले भारी वर्षा जस्ता चरम मौसमी घटनाहरूको सम्भावना र तीव्रता बढाएको चेतावनी दिएका छन्। जलवायु परिवर्तनका कारण तातो वायुमण्डलले बढी पानी सोस्ने र त्यसलाई भारी वर्षाको रूपमा खन्याउने भएकोले यस्ता बाढीका घटनाहरू बढिरहेका छन्।
सान एन्टोनियोमा १९ प्रतिशत भवनहरू बाढीको जोखिममा छन्। यो बाढीले सान एन्टोनियो नदी र सिबोलो क्रीकमा पानीको सतह बढाएको छ। यसले आगामी दिनहरूमा पनि बाढीको खतरा कायम राख्ने चेतावनी दिएको छ। अधिकारीहरूले बाढी प्रभावित क्षेत्रमा सडक र पूर्वाधारको क्षति मूल्यांकन गरिरहेका छन्।